KENANG DI ATI

Berami makai

2010-03-10T08:53:00.000-08:00

Lemai tadi di kangau ke menyadi lelaki aku ke di kuala baram berami makai bak rumah sida ia.
Ia tu bisi travelling ngagai ulu baram, nyadi kemari bisi pulai enda lama ke rumah lalu bisi meli anak babi babas siko. Murah ko ia, ko 50 RM siko. Apu...amat murah nya ko aku.
Apa agi ninga orang bisi mai babi babas, lalu kin meh kami sida menyadi indu aku ngusung sida ia kin. Lalu mai lauk upa lalis goren campur daun ubi...Akai dai, kenyang amat aku makai.

Kasam babi campur daun ubi.

Upa lalis campur daun ubi.

Sigi lauk semua di campur daun ubi magang2. Maia makai sida ngerara asi aku mimit aja, nya ku madah; asi maioh kami di holland din, utai ke nadai di empa dulu.

Udah ke makai lalu beperening ke pasu ke digaga bini menyadi aku nya, bansa kayan. Manah endar di peda aku, engka laban ke enda nemu nganyam kini, nya alai utai ke di gaga orang manah magang di peda. Kelia kala belajar nganyam tikai bemban bak indai, tang gamal tikai ke di anyam aku baka gamal aku empu ke nganyam ia. Tisi tikai belingkuk baka ular. Diatu agi meh tikai nya di simpan indai ku. Ke pengingat. Nyau ituk ngagai pasu nya tadi,agi sekali aku merening pasu nya, nadai aku nemu pasu nya di gaga ari "surat khabar". Baka ke digaga ari rotan. Udah di anyam, lalu di cat sida ia. Bisi ga orang ngasuh ia nganyam pasu ke besai baka tajau, baik endar bisi side income. Baik endar bisi idea nganyam ari surat khabar. Nya meh ko ia, kitai ga nadai rotan, surat khabar nya meh kena.

Pasu ari surat khabar...manah endar enda pia..?

Besikap

2010-03-06T06:57:00.000-08:00

Ah...lantang dah asai ati barang semua ke ka di bai pulai udah di simpan dalam beg magang. Segala sida gari enggau barang anak udah di sikap magang2. Aku sigi enda nemu enggau orang besikap ke barang tumu. Sigi last minute aja2. Tang nadai ga ngachau laban semua udah di tulis bak list.

Udah tembu besimpan, lalu betalipon ngagai menyadi ke miri, madah ke maia pukul diri datai di airport miri. Awak ke orang nyamai ngambat. Eh...nyau enda berasai neh maia ke ka mupuk pan nyau datai. Mupuk meh kami duai menyanak pagila, kira ke pukul 3 tengahari jam kami ditu. Jauh pejalai tu....be"transit" dulu bak Cairo sebedau ke Kuala Lumpur. Pukul 11 malam hari satu baru kami duai menyanak datai di miri.
Besampi meh awak ke nadai apa mana sepemanjai jalai kami duai. Arap ke selamat datai di miri serta selamat pulai ke Holland baru ila.
Mupuk dulu....

Anak Patung Rabbit nya sigi enda tau tinggal. Enda tinduk ia enti patung enya nadai. gamal ngenyai nya.

Nyelai ga anembiak neh....but pan gamal utai nya rindu meh sida enti utai nya sigi di kayam ngah agi mit.

Ayam Baru

2010-03-05T01:32:00.000-08:00

Lemai kemari laun tudah Frank pulai ari kerja, laban ngetu dulu bak kedai computer ngambi laptop ke di order kami duai sarinya. Enti baka maia ke pulai ke menua enda bangat nyempil amat, bedau ga aku bangat begaut ka meli laptop ke baru. Ukai baka ke nadai ga komputer dalam rumah tu.Tang nya meh, enggai ke nadai di kena maia di miri din ila. Ni alah tudah anak nyau enda ingat ke gamal apai diri, sepengelama ke diau di miri ila....hehehehe..... Kiruh amat ga ke "cyber cafe" aja2 maia ke ka beguna ke komputer. Bisi enggi diri empu nyamai agi, temu on ke aja maia ke ka ngena.

Munyi ke salah jako seleka, dalam ruamah tu bisi 4 igi komputer. Sigi di sadau bak opis Frank, sigi kena meda tv di bilik besai, di "conect" ke ngagai tv. Awak ke berentak agi maia ke meda tv ari Malaysia. Enti meda ari komputer empu, enda berentak laban skrin enda besai baka tv. Kami duai sigi siti siko laptop. Nyamai mangku enggi diri empu.
Au...nya aja ke saritu, ka ngerituk ayam baru ke tu dulu......

Laptop Oh Laptop...

2010-02-28T12:01:00.000-08:00

Gara2 ngaga template baru, laptop alu jai. Begiga ke template bak sebelah google serta survey sekeda site ke bisi blogger templates, tiba2 lebuh aku ngagai siti site diak alu pansut utai ke baka "shield" bak taskbar madah ke laptop aku bisi virus. Internet Explore ke di buka pan padam. Enggai nyadi di buka agi. Di scan aku ga semua document dalam computer, nadai ga virus. Virus scanner aku sigi enable ga.
Bendar amai tudah Frank ngadu ke seari ari kemari. Enggai meh nyadi agi. Sayau meh aku meda laptop aku nya, tang kati ko enggau deh. Salah diri empu enggai jenuh jari. Eni lah aku nemu tau bakanya.
Sehari2 tu tadi kami duai begiga ke laptop baru bak kedai, tang kedai elektronik maioh tutup laban ti hari minggu. Harap ke ulih meli ke bukai sebedau mia pulai ke miri ila.

Naka tu dulu cerita aku....agi tusah ati tu...uhuk...uhuk

Gaya Hari

2010-02-22T02:45:00.000-08:00

Enda sabar asai ka ganti musim chelap tu abis. Lelak amai engkutung aja2 dalam rumah. Musim chelap aja tang enti bisi pansut mata panas baik ga agi. Bisi ga nyepi asai panas mimit, nya tak nadai mimit. Ke ka ia mambam aja2 mua sida hari. Ujan agi, salji agi....huh
Salji labuh pun bulan duabelas suba sampai ke kemari agi bisi meh labuh. Dua tiga hari ngetu udah nya labuh baru ga salji. Meda gaya hari nyau ingat ke sempama kitai iban 'hati hari'. Ia nya orang ti ngembuan hati baka hati hari. Tusah begulai enggau orang ngembuan hati bakanya. Kadang ia enggai nanya kitai tauka mua mengut2 meda kitai tajapan kitai nadai penyalah.....eehhhh nyau limpang ke bukai randau aku tu.

Gamal hari kami tengahari kemari.

Ni baka hari di menua kita deh wai? Enggi kami ditu, nya meh munyi ko aku, tang nasib ga minggu nyin ila kami duai menyanak mupuk pulai ke miri. Tang menua di miri naka ia pengangat ga. Nyau ga kelah2 baka manuk ke aus. Asai ke ka nyandik aircond aja2, sema ke jako.

Terung tunu

2010-02-02T14:22:00.000-08:00

Tepantup dah ati belauk ke terung tunu, lama dah tetengguk, tang jari tu kelalah ka bekupak ke kulit terung nya.

Lauk enti di tunu bau agi rengut disium ari ke di panduk. Ikan ke, babi ke, manuk ke. Agi kelia ka endar ngasuh indai nunu buah terung, enda milih terung cina tauka terung iban.

Ukai nama nyawa nyau begiga ke utai lauk bakanya, ati tu sigi udah di menua din taja tubuh tu agi ditu. Eh....enda nya tentu berasai iga deh, sebulan da agi nganti....yahooooooo gagit endar asai ati tu.

Hari Jai

2010-02-02T04:54:00.000-08:00

Maia aku ke nganjung anak ke skul pagi tu tadi, bendar begadai bejimat bejalai belubah lubah enggai ke tegelincir teterap. Jalai licin amat bekau ke ujan semalam2 kemari ampai ke tengahari tu. Sangka ku sampai ke malam tu agi meh ujan. Salji ke labuh seminggu minggu tu nyau lela nyadi batu ais. Nya ke mai jalai bangat endar licin.
Bendar kami duai menyanak bepegai jari maia bejalai, enti semina ujan baik ga agi. Nya, udah ga ujan, jalai ga licin, ribut ga agi. Bendar getan ke payung enggai ke terbai.

Ulah anak, nya jalai ke maioh lupak ai, nya ke ka agi di indik. Eni enda nyau basah tanchut panjai. Nasib bisi mai spare tanchut. Beganti baru ga bak skula.
Begedi endar ku meda hari jai bakatu....

Booking ticket

2010-01-17T03:44:00.000-08:00

Tajapan agi jauh ari maia ke pulai ke menua, tang enda sabar agi nganti maia ke pulai. Lelenggau amai ke bala kaban belayan di menua din. Ticket udah ga dibooking, nye mupuk meh kami duai menyanak kena 7hb march. Sampai 26hb jun baru kami duai pulai ke holland baru. Nya baru berentak cuti ngelama nya tiga bulan setengah. Apai Wesley engka maia gawai baru bisi kemiri. Ia sigi rindu enggau orang berami begempuru maia gawai. Rindu amai meda gaya kitai iban begulai enggau pangan diri maia bisi pengerami ko ia.
Jauh ga pejalai kami duai menyanak. Amsterdam - Cairo- Kuala Lumpur - miri. Tang enda ngawa ga lelak mimit. Maia udah betemu enggau bala kaban, nyau udah pengelelak nya ila. Semina siti utai ti ngasuh aku irau ati, tan ke enda tudah anak laban pengangat hari kitai di miri din. Sema ke jako 'pansut ari peti ais. tama ngagai oven'. Ko diau bak hotel lembau ga...enda alah ga begusung ke bala ngena taksi setiap hari. Cuma tinduk pulai ke hotel. Masau duit ngapa ko ati aku.

Gambar utai ke udah di angan angan ke dalam hati din. Sayur kampung sigi di ketenguk ke belama.

Main 'SLEE'

2010-01-15T12:09:00.000-08:00

Saritu tadi semadi ke nadai pengawa, meda hari tak manah mata panas pan nyau perencing. Bejalai neh kami tiga menyanak ke kaki bukit ti enda jauh ari tebing tasik.
Enda pia nadai meh pengawa diau di rumah, runguk runguk nat ke penyelap. Kira ke tangahari meh kami ke bejalai nya. Datai din sigi udah maioh bala orang di peda aku. Taja pan hari agi snow serta chelap tang maioh ga bala bebai ke anak bejalai diak. Aku sigi nadai nemu tempat nya diak tau endur bemain luncur, laban ti nadai kala ngemalat tu kami ditu snowing sekumbang aku ke udah datai ditu, nya alai ngelamatu nadai ga kala kia bemain ais. Nadai tentu lama kami tiga bemain diak, aku nyau enda tan agi. Tunjuk kaki nyau enggai nyadi di kebut ke. Asai ke di tuchuk jarum pemedis kelalau chelap.

Ko kami ditu 'slee' nyebut kerusi luncur nya. Bak kitai iban enda ku nemu nyebut ia. Slee nya meh ke kena aku nganjung tudah bujang ku nya ke sekula pagi hari serta ngambi ia pulai ari skula. Ngena stroller, ka pedis mimit ka di asur ke bak salji, nyau bebendar ngasur ka. Enti ngena slee nyamai amai, temu di irit aja.

Gambar siti ke dibaruh tu di ambi bak depan tasik. Tang tasik nya semua udah beku.

Arap ke hari majak manah meh, nadai turun salji agi, susah amai, ka mindah pan nyau kadang terjanggal. Maioh pengawa enggai nyadi.

Pengawa saritu tadi

2009-12-18T10:54:00.000-08:00

Nyau enda ingat ke maia ngisi form masuk kindergarden anak aku nya, baru saritu orang ngangau ke. Awak ke kami duai Frank ulih meda gaya bala pengajar ke begulai enggau anak mit serta meda gaya anak mit begulai enggau pangan diri bak kindergarden nya. Rindu ga aku meda bala anembiak begulai enggau pangan diri. Taja agi mit tang nemu amai. Enda beanu ke pangan diri.

Udah meda serta berati ke gaya cara pengajar enggau anak mit diak, kami duai Frank lalu netap ke maia patut nganjung Wesley kia. 5 bulan 1 taun baru ila tudah tuai start skula. Hari 2 enggau hari 5 aja. Dua kali seminggu setengah hari aja. Tang tadi di asuh bala pengajar ninggal ke Wesley enda lama di skula diak, laban sida ka meda gaya ia enti kami duai mupuk mulai ke diri. Nampuk meh orang nyabak, ngasuh ia gaga serta bye bye ngagai kami duai. Sigi nadai nemu takut ke orang. Enti betemu enggau bala orang sebelah jalai serta pasar sigi di sapa magang. Di hello ke ia magang.

Sekumbang ke nganti anembiak ngetu tangahari sempat ga ke pasar enda lama bebeli ke sekeda barang dapur. Udahnya 11:45 lalu nikal ke skula baru ngambi Wesley ari skula. Pengajar madah ke Wesley nadai masaalah begulai enggau bala anembiak diak. Pansut ari skula lalu bemain salji enda lama bak luar skula. Nyau capuh bala anembiak diak bemain salji.

Enti snow majak labuh baka ke saritu, ulih lah ngaga snowman ho..ho..ho..ho

MERRY CHRISTMAS

2009-12-17T00:52:00.000-08:00

Sekumbang empat taun tu, baru ku meda salji labuh maia bulan 12. Ngelama tu bulan 2 kadang baru bisi salji. Baru bisi agi ga mood christmas. Taun tu simple aja christmas tree kami tiga menyanak.

Lalu ngagai bala semua ke bisi maca blog aku tu, aku meri jako selamat nyambut serta ngintu hari christmas.

p/s C, kita tiga Sika enggau Nora enti bisi ngabang, nyangkung au. Kami ditu mina malik ngagai pun kayu christmas serta ninga lagu christmas aja maia christmas. Engkutung nat ke penyelap....

Pengerami Anak Mit

2009-11-30T03:35:00.000-08:00

Hari enam tu tadi orang bak opis sida Frank bisi nyambut hari Sinterklaas. Pengawa tu sigi di intu tiap 28 bulan 12 ninting taun. Pengawa tu digaga specially ngagai orang ke gawa diak ke bisi anak mit.Dua minggu sebedau pengawanya di ator diak bala apai indai di asoh milih prizin ke anak diri empu ari katalog kedai ayam. Rega prizin nya enda tau lebih ari 15 euro. Tang apai indai anak mit madah ngagai bala anak, Sinterklaas ke meri prizin nya ngagai sida ia, laban prizinnya ke disua ke Sinterklaas ngagai bala anak mit. Kasih tudah di kemula ke.

Sinterklaas nya siko ari pembesai dalam gereja ari Sepanyol ke bisi kuli bansa nigro ke dikumbai Zwart Pits(Black Pits).Aku pan enda nemu nama kebuah sida ngagai ke bakanya. 5 bulan 12 ari pengada Sinterklaas, nya alai sebedau pengada ia, diak ia alu bejalai mai prizin lalu meri ngagai bala anak mit. (Kenu ko cherita bala apai indai madah ngagai anak sida...cherita dongeng aja)
Rindu amai meda bala anak bala anak mit betanda maia ke dipasang ke muzik serta bemain main ke bisi di gaga.

Pecaya amai bala anak mit yang nya amat2 Sinterklaas datai ari Sepanyol. Kasih tudah bala anembiak di kemula ke...

Betuchuk

2009-11-24T07:28:00.000-08:00

Lemai tu tadi aku nganjung Wesley betuchuk vaccination new influenza A ngambi ke enda jampat di rampit. Semua anembiak ditu bisi nerima surat betuchuk. Endur ke betuchuk nya bak sport hall enda jauh ari rumah, kira ke 15 minit bejalai kaki.Bejalai kaki kami duai menyanak, seraya ke sesais (excercise). Laban Wesley bejalai kaki ga, bisi setengah jam pejalai kami duai. Ukainya laju singkang anak mit umur 2 taun. Datai din, dinga ku nyau beterauh bala anak mit nyabak. Irau ga ati, enggai ke Wesley pedis laban jarum. Maia orang ti nuchuk, aku sigi enggai malik ngagai jarum. Laban ti buyan ke jarum. Sangka ku penapat inat Wesley nyabak. Sekali enda bemunyi tudah tuai. Meliar ai mata enda meh. Pama endar ga orang bujang ku nya neh. Suba maia ia nipas pun bunga ros, nyabak ia laban jari di kerawis duri bunga. Tu, di tuchuk tak enda. Engka nadai asai bak ia kini. Asai ke ketup semut aja. Stroller di bai ngapa, enda di tepan. Mansang pulai bujang tetap bejalai kaki.

Sintmaarten

2009-11-11T12:49:00.000-08:00

Tu pengawa bala nembiak malam tu tadi, ngintu sintemaarten.Berengkah pukul 6 lemai. Bebai ke lampu serta belagu ngagai rumah sebuah sebuah. Udahnya di beri orang candy serta roti ke bukai. Ditu untuk bala nembiak aja. Apai indai semina ngulu ke tang enda belagu.
Tudah Wesley laban ke apin nemu enggau orang belagu, ngumpul roti aja. Enggi orang siti aja lampu, enggi Wesley dua iti, keterubah jai. Nyau charik sida kertas di biau ke kiba kanan, ke dua bakanya ga. Nye...dua dua jai sida mentol lampu enggau kertas nyau teberayan belah jalai di gasak ia. Enda aku nemu pemanchal anak nya.

2009-11-06T08:32:00.000-08:00

Malam kemari skul ke endur aku bskula ke jako dutch bisi jamuan ringkas kena ngrai ke bala student ti pass peresa. Kira bala ke nyadi permanent resident ditu. Orang ke pass nya tadi tau ngaga passport dutch serta bulih IC orang ditu. Lalu hak sama baka orang dutch . Udah lima taun ila enti bisi pilihanraya udah tau enggau orang ngundi. Kami ke pass nya tadi bisi di beri orang diploma ke di kumbai orang ditu "inburgering diploma'.Ukai diploma baka bak U ia wai, anang salah sangka. Diploma ko orang, diploma ga ko aku. Bala sekeda ke udah nerima bisi meh mai. Enggi aku bedau di ambi. Bisi meh surat udah datai ngasoh ngambi 20 Nov tu ila bak Amsterdam. Jamuan nya nadai maioh bemacham utai dempa, bala sida cheese & sausage, augurk (cucumber pickle), roti keropok serta kek. Jamuan nya enda lama, maia bala ke mupuk pulai lalu di beri bunga Hyacinthus siti siko. Gift ari skula.

Kira pukul 9 bala nyau mupuk magang mulai ke diri. Aku lalu talipon ngagai laki aku ngasuh ia ngambi aku pulai. Datai ia bak tempat aku ti nganti, diak ia madah ke kerita jai. Temu padam ko ia. Nasib padam diak, enti tak padam bak tengah jalai, benung musin roundabout. Bakani nya dah? Nyau betelipon dulu ngagai orang ti ngadu ke kerita ANWB. Laban ke bisi contract enggau sida ia, nadai ga tentu beleman endar ga. Sejam lebih kami tiga menyanak nganti dalam kerita. Tudah anak kasak kasak ka pansut, enggai nyadi ga laban hari ujan tambah chelap mega. Bekurung dalam kerita aja. Nya meh penudah nadai bala endur ninggal ke anak di rumah. Kini kini dibai aja aja meh.
Datai orang ke ngadu ke kerita, lalu meresa 'penyakit' kerita nya. Paduhal jai dynamo. Nya alai bateri temu out ti diri. Cas ga bateri dulu. Nyau pukul 11 lebih kami menyanak datai dirumah. Kasih tudah anak, kulap kulap mata ka tinduk. Tang laban patung rabbit ia ke enda ingat dibai, nya ke ngasuh tusah mimit ka tinduk. Nasib ga enda mipit, nginsap tinjuk jari aja. Nadai ngawa laban jari enda nemu tinggal.

Laksa Tomyam

2009-11-05T03:55:00.000-08:00

Nadai nemu nama utai ka di empa makai tengahari tu. Ngebak ke jemari, meda bisi perencah tom yam lalu ngaga laksa tomyam. Enggi aku di campur enggau gula mimit. Kelalu bisa asai chabi bak perencah. Enda tan.
Enti kelalu pedas perut enda tan.

Children play paradise

2009-11-03T04:09:00.000-08:00

Ari minggu tu tadi semadi nadai pengawa kami tiga ngagai tempat endur anak mit bemain. Kasih ga meda tusah anak nadai tentu mindah kebukai. Enti hari bisi manah mimit bisi ga mai ia pansut ke children play ground.
Tang sekumbang ke autum tu hari jarang manah. Ujan ke ka agi. Enti nadai ujan, beribut ga. Malas ga ka pansut. Chelap di puput ke angin.

Nyau lemai amai kami pulai. Udah makai, enda lama udahnya kira ke pukul 7 lalu tinduk tudah anak.
Nadai dani sampai ke pagi. Lelak kini.

Tubu guring

2009-10-30T11:51:00.000-07:00

Lama dah aku enda belauk tubu. Tubu di beli ku minggu nyin kemari tang lalu enda dipanduk. Tang ukai tubu fresh, dalam plastik. Baka tubu kasam muti ia ke enda masam.

Nya meh di kenyadi ke tudah pangan. Enti di menua din sigi enda dipalik tubu bakanya. Nyamai agi tubu fresh, guring gulai daun sabung, tekuyung mimit serta kulat mata babi...hmmmm. Nunda ko sempama, entua mansa enda di palik. Tang tubu aku nya di guring gulai isi manuk. Udah nya aku manduk rendang chapi.

Tubu guring & Rendang Chapi

Nya meh lauk kami menyanak lemai tu tadi.

Berumah Baru

2009-10-20T08:02:00.000-07:00

Pei, nya asai ke ka patah asai punggung di bai nyungkit sida wooden floor. Se hari hari kemari aku ti rengkung rengkung. Enggai nganti ujung minggu ngadu ke lantai kami nya. Kala ke rajin asai tulang,
mupuk ga tudah pangan mangkung mimit mimit. Sangka ku sigi bisi bala orang sepiak sepiak ngelu pala ninga aku retuk retuk sehari hari. Jampat agi tembu nyamai agi ga asai ati. Ensana muai wallpaper ke lama, ka di ganti baru. Frank nadai ari nulung, nyau malam baru datai kerja. Kasih ga meda tudah lelak. Ujung minggu baru ia bisi hari laban ti nadai gawa. Enda ngachau ga gawa kediri. Awak ke bisi experience.

Marcus orang bilik sepiak

Kemari gawa kediri. Saritu bisi orang ari bilik sepiak nulung aku. Setengah hari aja alu tembu. Ukai nama ka nulung, laban ia ke ke ngempu kayu ke di sungkit aku nya. Enti enda pia, nampuk meh orang ka nulung kitai.
Bini ia madah ke diri nyau gelu pala ninga aku sehari kemari. Kapa aku peduli, indah ia kadang rauh rauh tengah malam kira pkl 1@ 2 pagi belah luar bekanggau ke mayau nadai meh kitai ngunkit. Ukai nya mit mit nyawa, nyau ambis dani tudah anak ku ( sempat meh ngumpat hehehe)
Nyungkit papan udah tembu, masang papan ke baru ga bedau. Wallpaper bedau ga di lekat. Bedau agi 'interior'. Nyau retai asai tulang tu di bai gawa.
Ujung minggu tu mupuk ngaga utai bukai...

Can't leave (Mariah Carrey)

2009-10-13T02:49:00.000-07:00

Geli ati ku meda video siti tu. Ken Lee nya engka nama boyfriend ia kini...

Ngerumpang stor

2009-10-12T08:26:00.000-07:00

Lama amai udah anggur ka ngerumpang stor sepiak bilik besai kami nya, tang lalu nadai kala bisi ari.

Bisi aja pengawa bukai ke ka dikerja. Tang nasib ga hari 6 tu bisi gi awak endur gawa.

Ka ngerumpang ngicha ke ruang tamu nya besai agi buka. Tambah mega nadai meh maioh utai di simpan bak stornya.

Asisstant apai ia.

Kiroh amat sarinya berangkut ke dinding ke udah dipangkung. Debu enda nemu ku agi bak belah bilik.
Dua hari beruntu kami duai kiruh. Bedau agi kiruh ke asisstant ke ka endar nulung, ukai nulung nama, nulung ngachau.
Nya meh nadai pengawa nginga pengawa....

Peresa

2009-10-11T11:20:00.000-07:00

Pagi ari lima tumu mimit kami tiga menyanak dani, laban pukul 10 pagi bisi orang ka meda ke Jeep ke ka dijual. Ari ke regah regah bak depan rumah, dikena enda ga. Manah agi dijual. Aku enda iboh, sigi enda
nemu driba. Laban balat endar kesal bak ati, nya alai sigi enda ka ngambi lisin driba. Ia ga bisi ka latah mimit,
enda alah krita nyau bak sebelah parit di bai aku. Tambah mega tengahari lagi kami tiga ka ke Alkmaar. Laban aku ke bisi exam ianya praktikal exam bejako dalam bahasa dutch. Harinya udah exam, tang dua
subject aja pas. Siti fail, nya alai nyambung baru peresa ke enda pass nya. Semua orang ke datai ari
menua luar serta ka diau ditu mesti skula baru ke jako dutch serta ngambi peresa, enti enda, enda ulih diau ditu. Skula tuai tuai tu enda tentu ka dibai belajar agi sepi aku. Enggai tentu masuk bak untak utai kedipelajar. Engka nyau udah betegar kini.
Pemulai ari Alkmaar alu singgah enda lama bak kedai Surinames meli buah rian frozen. Meda drama melayu dalam tv pansut gambar rian, telefon ngagai menyadi ku dimiri becherita pasal buah rian ngemaiohnya ga di miri. Pemuas ke ninga nyau tetenguk neh tudah diri.

Tau di kenyadi ga taja pan frozen. Nya meh enti nyawa udah rangka.

Fitness

2009-10-05T05:18:00.000-07:00

Gaga amat ati aku laban udah ke di order aku ari TelSell udah datai. Utai nya zumba fitness. Kati madah kenya...hmmmm exercise with hot rhythms baka salsa, reggaeton, merengue enggau samba.
Tau endar ngemansut ke peluh. Nya meh semadi ti nadai pengawa diau di rumah. Step enda ga tusah ka di titih laban endang bisi instructor madah ke cara training tips. Ka jogging malas ga. Hari nya majak chelap sechelap.
Seraya ke training betanda kena gawai taun baru ila.

Ikan Masin

2009-09-28T03:24:00.000-07:00

Udah berasap dapur kita tengahari tu? Enggi aku bedau. Lemai lagi ka nguring ikan masin ke dibeli aku sarinya. Nemu kita apa nama ikan masin tu? Enti enda salah aku ikan masin tenggiri kan?
Ikan tu di beli ku bak kedai bansa surinames. Nyamai amai ikan tu sepi aku. Empa enggau asi agi angat,
enda ibuh belauk utai bukai, ikan tu aja nyadi meh. Agi bak miri suba bisi ga meli ikan masin tu. Nya meh beli amai aku enda ingat ke nama ikan tu. Selalu di jual bak market muhibbah miri.
Tang enda tau empa maioh, enggai ke darah tinggi. Siko tu cukup meh kelauk setaun.
Kita nama lauk lemai tu lagi?

Diet.....!!!!!

2009-09-15T05:34:00.000-07:00

Nyau berasai sendat asai sida gari. Lemak nyau bisi melebir kiba kanan. Punggung nyau nadai tentu shape agi. Diak aku lalu nguji betimbang baru. Apu.........patutlah tak nyau kembu asai sida kuyu, nyau ulih dipeda maia ke malik ke baruh, paduhal udah niki 3kg. Tu enggai nyadi enda tu diet baru.
Udah ke beranak suba diak berat aku turun ngagai 54 kg. Nyepi diri enda berapa gemuk, alu nadai nemu betagang makai utai. Apa agi sida lemak lalu bekeloni dalam tubuh. Tambah agi maia ke cuti ke miri 2008 suba, sigi nama utai ke ka di empa sigi di pajak ke magang. Kelebih agi utai tempa ke nadai di Holland. Maia ke betunga enggau diri sebilik berami makai, sigi nyamai magang utai. Pemulai ari miri, nyau niki ngagai 63kg pemerat.
Bulan 5 tu tadi aku nguji diet ngena buku ke sigi di kena orang ke ka diet.

Bereiken je ideale gewicht ( achieve your ideal weight)

Dalam masa 2 bulan aku turun 7 kg. Tang sekumbang ke cuti ngagai menua selatan peranchis, Maisonieuve camping bak dordogne dalam bulan 7 tu tadi, lau di tinggal ke aku diet aku naya sampai ke diatu alu nadai di sambung agi. Enti sigi dititih ke tiap hari amat amat pemakai ke di padah ke ia ari breakfast sampai lunch. Sigi bisi berinsur pemerat. Indu ke dalam gambar nya weight consultant. Nama ia Sonja Bakker.

Dalam buku nya endang bisi sukat berapa penyampau utai ke patut di ambi kitai maia pagi, tengahari enggai makai lemai. Dagin, ikan enggau manuk semina 75g aja tau dempa (enda cukup ke tinga). Asi enggau kentang 125g .Sayur tau maioh. Ia ke maioh agi tau diempa bala sida salad.

Bisi bala orang bukai ke nitih ke buku ari Sonja Bakker bisi sampai 25kg turun berat. Ukai siti nya aja buku

ari ia. Maioh agi ke bukai. Baka ke dikena maia musim panas serta maia maia ke bisi cuti ke bukai ( dalam europah aja)

Buku ke ngundan pemakai kitai ari asia nadai dah aku tetemu. Engka ia enda nemu nama utai di empa kitai ari asia kini.

Ka ati nexts month aku ka start diet baru. Arap ke mujur meh....

Gambar

2009-09-14T15:15:00.000-07:00

Kemari semadi ti nadai pengawa dia aku bisi nguji ngaga gambar nyadi kartun.

Tu meh penyadi utai di gaga aku kemari.

Gambar tu tau di gaga kitai ke gift lalu di order. Baka sida mug, t-shirt, mug, keychain etc..
Rega enda tentu mar kurang lebih 15 euro tau ka nitih ke pemesai. Enti baka keychain murah agi ga.

Kita deh nama pengawa sehari-hari kemari...?

Kindergarden

2009-09-11T07:26:00.000-07:00

Tengahari tadi kami 3 ngusung tempat ke ka mendaftar skula ke Wesley. Kira ke Kindergarden sangka ku. Ari umur 2 sampai 3 taun umur bala nembiak dia. Ko kami ditu nama skul nya Peuter speelzaal. 1 november masuk 2 taun tudah tuan ku nya.

bala cikgu ke bisi dia.

Laban kami ke nyau ko laun mimit, dia bala nembiak ke overstay benung makai bread. Wesley

tanpa segan silu lalu tumpang sekaki, ukai orang bisi ngangau. Udah ga ia makai di rumah tadi, engka tak nyau lapar baru kini meda orang nyau bebantai ke utai....bak nama ia agi nembiak.

Enti kitai ke besai tuai bakanya, enda tentu brapa utai sangka ku.

Bah ni kita nama pengawa saritu..?

sushi

2009-09-08T03:47:00.000-07:00

Berapa ari tu udah tak rajin endar ga asai tulang tu begaga ke utai empa. Kemari ngaga sushi, lama udah tetenguk ke sushi. Meli di kedai, kadang nadai asai kadang tak tengkering asai asi. Nyamai ngaga kediri. Tau ga di kenyadi ke asai

Ensana ngaga kari manuk ga, dikena makai roti canai. Roti canai nya sigi udah siap. Beli ku bak kedai bansa Suriname. Muti nabak ke ngagai kali aja. Nyamai sepi aku.
Suba kala ku nguji ngaga roti canai kediri empu. Pama ga ngerenjuk tepung nya enggai ke enda sebati. Nibar roti enda tentu nemu tudah pangan, nya alai ke enggai ngaga agi. Madi kelalu balat tibar, abis lekat belah sida siling. Pechuma nyuluk, ukainya bisi engkuit.

Enti bisi utai bukai ila nyambung baru......ta ta ta

2008

2009-09-07T06:24:00.000-07:00

Me & my sister......sapa bajik agi? Enti ngundi aku angkat jari. Enti ngundi sister aku angkat kaki. Tauka dua-dua enda bajik....hai wai.....

Taun nyin kemari kami menyanak bisi nemuai ke miri. 2 bulan cuti laban ke lalu enggau orang begawai. Tambah mega ngadu ke surat khawin kami duai di M'sia, ni nemu jemah ila ka pulai lalu netap di miri, engka ga nyamai mimit bagi Frank ( di pelaba ke aku )

Apai & Anak - Wesley Rimung Menage & Frank Jan Menage

Bak Pasar Betong

Ia tu sigi enggai enggau orang bekena ke T-shirt enggau tanchut ke tebal agi. Ko luput ko ia. Enda tan angat. 2 bulan kami cuti enda meh ia ulih neleba ke diri enggau cuaca kitai di din.

Tina & niece aku Sherry

Nganti ke nyibur ai ke bala pengabang ti ka niki.

Dari kini ke kanan heee..ap..Sherry, Nora, Urai & menantu aku Tini, nye udah bisi menantu kami wai. Uchu pan udah meh bisi, isk..isk...isk..tuainya aku. Menantu menyadi kami ke tuai menantu aku ga kan..kan...kan? Ia ke belakang nya, jelu kami Ganya. Ia ga enggai skula, selalu ponteng. Nurun amai nurun ari rumah tang enda datai di skula. Ila baru nyepi ngiga kerja enti nadai pemandai. Tang enti pasal ngiga utai ke lauk belah babas no satu. Ni ni maia ka aja di bai mindah.

Nephew..Shen

Bujang mit kami. 6 bulan tuai ari anak aku, tang jauh mit ari Wesley. Enggai tentu makai tambah mega bisi pansa sida asthma. Pemanchal anang ngira. Mak ia madah, enti nadai pemangah tau minta ngagai Shen. Enti tepantup bak pintu, pintu palu. Enti tekelincir bak lantai, lantai tembap. Ibuh agi enti bala sida ke sama mit bisi nengar ia mimit, jari ia lalu datai. Di ajar meh nya enda ngasuh baka nya, tang anak mit...tusah...tusah
Nama amai enda ku ingat ke, kelalu balat english nama orang nya. Nyau bebelit dilah nyebut.

Happy Family

Enggau indai ku bak imperiall hotel

Ngirup tuak bak rumah menyadi ku bak Kuala Baram. Apai tuai ku nya sigi ka endar ngirup tuak. Nyamai ko ia. Maia indai ku ke bisi enggai kami nemuai ke Holland, bisi meh tuai ngaga tuak ke Frank. Ciping sigi mai ari miri. Diatu agi meh tuak nya. Sigi dikelimat. Leboh ke ngirup tuak, tebayang asai miri serta rumah panjai ko Frank. Hehehehe....sigi nyamai tuak kami iban.

Geng Rapat

2009-09-07T05:39:00.000-07:00

Tina

Nora

Sida tu sigi geng rapat aku di miri. Sigi begulai baka diri menyadi, saum pemakai, saum pingai nunda ko orang. Nama setaun enda betemu sigi lelenggau amai.
Sebenar 7 iko kami ke segeng kebendar tang diatu nyau nitih ke periuk diri. 2 iko (Beena & Tracy) belaki di Johor. Siko (Anne) di niah lalu 3 iko agi di miri (Beeca. Tina & Nora). Aku pun di Holland. Kadang maia ke bisi begempuru , bbq serta bisi clubbing bisi sida sms aku. Jeles amai ku ninga....tang apa boleh buat.
Arap ke next year kitai ulih betemu baru. Ulih ga aku melepaskan rindu dendamku ngagai menua miri, kaban belayan kelebih agi pemakai kitai malaysia specially pemakai rumah panjai (gemuk kira dudi janji anang kurang makai). Enti maia pulai ke ruamah diri nya baru berunding ke diet...enda pia kita wai.
Aku nama pulai ke m'sia sigi enggai enggau orang bediet. Isa di Holland nadai utai dempa bakanya.
Nye, nyau becampur aduk utai di tulis aku ditu.

Kemari

2009-09-07T04:52:00.000-07:00

Pengawa tu baru orang rindu....

Gamal mua orang ringat

Tengahari kemari meda papa ia bisi di luar berandau enggau orang sepiak, diak Weslay lalu nunjuk ke basikal ia mai aku keluar. Sangka aku orang ka nepan basikal, tang enggai ga. Ia ke bendar ianya ka ngasur ke aja. Nyau tasur ke ngagai kereta orang.Puas berara ke. Eh kapa ku nya... ambi ku basikal ia lalu di bai ku pulai ke bilik. Nyabak meh ia....pecuma lagi kereta orang scratch

2009-09-05T16:36:00.000-07:00

Gambar indai ku maia ke bisi di bai kami bejalai ngagai Bitburg Germany. Nya meh enggai ke enda menua orang, tang enda ga betah. Enda nyamai ko ia, nadai pengawa ngawa. Orang tuai ukai nya ka diau jenuh, nama nadai nurun ke tanah. Irau ke manuk nadai orang meri makai meh, irau ke kebun lada repa meh. Ila tau endur rusa belalai kebun aku ko tudah tuai. Tang laban tiket ti udah di beli, ko pan enda tat ke aja meh, nganti maia ke pulai...I love you mom..

2009-09-05T16:32:00.000-07:00

2009-09-05T16:30:00.000-07:00

Nya ni, nya meh pemaioh beg di bai pulai. Enggi kita kala beringku baka aku enti leboh pulai ari menua?

2009-09-05T16:03:00.000-07:00

Pemulai ari menua

2009-09-05T15:47:00.000-07:00

Mansang kutai ke miri siti siko beg kami duai Frank. Pulai ari miri nyau double triple beg kami duai. Laban indai aku ke bisi di bai ku nemuai kitu, apa agi alu ngambi ulih aku mai utai maioh keagi. Nama utai ke di bai ko kita..? Nama agi enti enda sida rempah ratus kena manduk lauk serta utai empa, sida daun ubi meh nya, sida kasam babi meh nya, eh maioh meh agi lebih 100 kg pemerat beg kami 3... Nasib kastam nadai gecheck beg maia datai bak airport schipol. Aku nama pulai ari menua sigi berintun mai utai pulai

Buah ati ku

2009-09-05T14:37:00.000-07:00

Tu gamal anak aku. Nyau ngeretung gamal bai main panas.
Ditu, laban jarang nyepi panas, kadang ka pansut maia summer tang enggai enggau orang suah
besari sari bejembui (laban ti sigi udah chelum nadai utai di anjung bejembui). Tambah
mega bisi kena pangka sida migrain.